Aspalditik genekien; 2007ko abuztuan gertatutakoa gogoratu besterik ez da egin behar jakiteko alderdi sozialistaren barrenean erabakiak Madrilen hartzen direla. Gainera, duela aste pare bat Roberto Jiménezek gogorarazi zigun. Egueseko UPNko alkatearen kontrako balizko zentsura-mozioaren aurkezpenaz ari zen orduan, eta literalki erran zuen PSOEren barrenean erabaki garrantzitsuak Madrilen hartzen direla.
Gauza bera berrestera etorri zen Rubalcaba jauna gurera aurreko egunean eta, bide batez, Nafarroako UPNri lasai egon daitekeela baieztatzera; nahi izanez gero legealdi osoko gobernua segurtatua duela, alegia. Izan ere, Madrilgo PSOEk ez du abenturarik nahi abertzaleekin. Nahiago du Nafarroan alderdi gisa desagertu edo ezerezaren hurrengoa izatera pasa ezi estatu mailako kontraerranak sortzea baino. PSOE —eta horrek barne hartzen ditu PSN eta PSE— ezer baino lehen espainiarra dela gogoratu digu, eta alderdiaren Estatu mailako interesen zerbitzura dagoela. Ondorioz, Nafarroa bi urte gehiago eskuinaren agindupean, eta PSN kili-koloaren zeremonian, egun batean hemen, bihar han, gaur baietz, bihar ezetz. Funtsezkoa sekula zalantzan paratu gabe.
jarraitu irakurtzen
0 comentarios:
Publicar un comentario