Mendialdeako ikasle eta gurasoak eskola-garraio publikoaren alde mobilizatu dira

 

Kurtso hasierarekin batera eskola-garraioaren polemikak eztanda egin du Berriozarren, izan ere gaur –lehen aldiz 35 urtetan- Mendialdea ikastetxeko haurrek eta gazteek oinez igo behar izan dute eskolara Nafarroako Gobernuak garraiorako autobusak ordaintzeari utzi baitio.

Berriozarko NaBairen aldetik argi eta garbi utzi nahi dugu ez gatozela bat Nafarroako Gobernuak egin duenarekin, beste mozketa bat da, beste eraso bat eskola publikoari eta horren atzean dagoen helburu bakarra dirua aurreztea da zerbitzu publikoaren kontura. Ez da egia arrazoi legalengatik egiten dutenik, jakin badakigu arau orokorrari jarraikiz Berriozarko Mendialdea eskola ez dagoela udalerritik kanpo, baina ibilbideak dakarren haurrendako arrisku nabarmenak eraman zuen bere garaian eskola-garraioa ezartzera, eta arrisku egoera hori ez da aldatu, besteak beste, trenbidea ez baita desagertu eta ikastetxera daraman errepideak estua izaten jarraitzen baitu eta bihurgunez betea. Beraz, legeari jarraikiz hau bezalako salbuespenezko egoera baten aurrean Nafarroako Gobernuak erantzukizuna bere gain hartu behar du eta eskola-garraio publikoari atxiki.

            Nabaria izan da, gainera, negoziatzeko hertsitasuna Hezkuntza Sailaren aldetik. Alternatibak proposatu zaizkie: eskola-garraioa zortzi urte baino gazteagoentzat bakarrik ezartzea, eguerdiko bidaiak kentzea… Beti eskatu zaiena txikiendako autobusak mantentzea izan da, heiek baitira ahulenak distantzia eta eguraldi txarraren aldetik. Baina ez dute amore eman eta garraioa kendu dute, portzentaje minimo batean lagunduko dutela aginduta guraso elkarteek ardura beren gain hartuz gero. Hutsaren hurrengoa emanen dutela erranaz, alegia.
            Gaur gertatutakoari buruz erran dezakegu ibilki joan diren haur eta gurasoek sekulako testigantza eman dutela herriaren eta agintarien aurrean. Modu baketsu baina indartsu batez erakutsi dute Gobernuak ez duela arrazoirik egin duena egiteko eta agerian utzi dute, halaber, elkartasuna dela bidea gauzak erdiesteko. Berriozarko NaBaitik bide beretik jarraitzera animatu nahi ditugu gurasoak eta auzokideak, oro har.